各位Vivahomehk fans大家好！小弟係「製錶達人－安東尼」，好榮幸可以幫Vivahomehk老闆Joe哥在Vivahomehk網站寫手錶專欄，分享下我30年來手錶製作嘅經驗以及少少心得，深入淺出地向讀者分享選擇及購買心儀手錶要注意嘅細節，期望推廣多啲人認識手錶製作上有趣嘢同冷知識，為我哋手錶業出分微力！
剛剛過去嘅2020年，如同其他行業一樣悽慘，係百年一遇嘅鐘錶業最慘淡嘅一年。各國大小鐘錶品牌銷售嚴重下跌，行業前路茫茫，尤其係龍頭瑞士鐘錶業，出口指數下跌咗兩成以上，大家都非常期望2021年會有轉機⋯⋯實行牛市再起！
縱觀鐘錶已經有幾個世紀嘅歷史，以往歐洲起源由全人手造的機械陀錶、到初期機械手錶在十九世紀初各國品牌漸漸冒起流行，發展不錯直到上世紀七十年代出現Quartz Crisis。在改用電池嘅各種平價又精準石英電子錶衝擊背後，引致大量瑞士傳統手錶品牌倒閉消失⋯⋯ 幸好其後透過各大財團收購，這些傳統嘅手錶品牌才可重生再復產，重新出發！好景不常，直到廿一世紀又有智能手錶面世，迅速嘅增長及已經超越左傳統手錶總出產數量同產值，令今日傳統手錶行業面對著史無前例嘅衝擊。
記得兒時差不多每個人從細個讀書到出嚟工作之後，手上都總會有隻錶來睇時間 ，不管是米老鼠款，超人誠哥的電子款、或者係發哥天長地久，定係浩南哥送俾山雞著草嘅五支火柴頭，都係定性為生活必需品之一。
眼見坊間帶手錶出街嘅人越來越少，老土啲講，現今世代真係好少人會為了睇時間去買隻手錶！除非有啲職業上需要！例如醫護人員或者係空中服務員等，事實係一般人係已經習慣用手機嚟睇時間，尤其年青一代嘅消費群，唔會覺得需要買隻手錶，故要做佢哋生意極之困難！
殘酷嘅現實，係手錶不再係每個人嘅必需品，也令手錶漸漸已演變成左fashion item、突顯個人身份嘅奢侈品luxury goods丶或者表達個人品味嘅工藝品。如今造錶或設計者只希望仲有人會買錶去襯衫、配合出席唔同場合戴，或購買作不同紀念如畢業、結婚，或各種特別日子紀念性禮品、又或者喺公司年尾送俾資深或傑出員工獎品等等。幸好，仍有好多人視名錶為投資工具，買來保值如同股票般等升值，多得這些種種「理由」，呢個老行業才得以保命。
作為行業持份者，本人必須勉勵同行不要放棄，還要與時並進，希望從危機中繼續各自努力，必須從手錶嘅定位同埋價值不斷演變中，搵到新空間發展！如像被遺忘多年至愛7吋及12吋黑膠唱片同Cassette卡式帶、菲林相機又重新流行起來了⋯⋯ 要相信手錶行業定能走落去！
這些年，除咗會收藏自己為各大品牌曾經生產嘅手錶，作為一本人生紀念册，喺呢度我會分享多年來從世界各地收藏嘅唔同錶款。我特別鍾情收購NOS(New Old Stock)，每隻都有各自品牌故事外，內裏有大量production生產上嘅參考價值，NOS是全新沒有其他人佩戴過保存良好嘅錶款。上世紀60-90年代，其實有很多經已失傳嘅技術，同埋當代幾破格嘅設計、外形顏色都好大膽創新嘅設計，都俾咗我好多靈感去改進生產下一款產品嘅方向，希望俾大家多啲欣賞當代的傑作。下次會介紹機械錶中機芯嘅秘密，敬請密切留意。👋
Comments