各位Vivahomehk fans大家好呀，每年鐘錶業一般會在第一季度陸陸續續起動推出新款，我已經兩年冇得飛去歐洲公幹睇展覽，不過疫情下各大品牌都排除萬難喺春季發佈咗好多新款式。
2021年特別色彩繽紛，推介大家可以去網上睇吓4月在瑞士日內瓦Watches & Wonder 2021同埋上海啱啱完咗嘅鐘錶發佈會，會發現各品牌真係有好多 ‘ 驚 ’ 和 ‘ 喜 ’⋯⋯
總括2021年主流大勢不只係- 綠色Tone主導、更開心見到各品牌關注環保，可以話係 ”GO GREEN” 之年。大家如買新款之前可參考一下。
上輯講咗核心嘅「內圍」- 機械機芯，今輯就不如講吓核心嘅『外圍』......即係生産手錶外殼嘅不同材料同特色。
根據FH瑞士鐘錶2020年度嘅出口統計數據，總出口數量下降了3成3後仍有13,800,000 units、佢哋分左以下5大類：
1. 不鏽鋼Steel : 61%
2. 貴金屬Precious metal : 2%
3. 混合金鋼Gold-Steel/Bi-Metal : 8%
4 其他金屬 Other metals : 10%
5. 其他材料 Other materials : 19%
Steel: 鋼是主流佔咗6成以上，鋼材係近百年最通用製作手錶嘅入門材料生產錶殼、錶帶，制扣及配件等，好處係耐磨噤用價錢適中、在原鋼色上更可電鍍不同Coating 顏色效果可變化出更多設計特色。
其實Stainless Steel不鏽鋼只係一個統稱，行內深入啲其實細分有各種唔同嘅級別，好似牛肉咁有本地牛，美國安格斯，高級嘅有澳洲、日本和牛Wagyu內裏再細分不同級數咁。
最基本嘅不鏽鋼有303、304用於中低檔次品牌、Fashion brands. 最主流用在中高品牌就係Medical 級別316 L (1.4404)，近年高級品牌已改用進化的316L（1.4435）好處是對抗皮膚敏感更好。
當然仲有R字品牌多年指定鋼水好啲嘅904L啦，磨光亮度比316L更勝一籌, 其級數就等於日本A5和牛般超高檔。
Precious Metal:只有2%的貴金屬大致上包括黃金Yellow Gold，白金White Gold， 鉑金Platinum， 玫瑰金Rose / Red Gold 及 銀 Sterling Silver 925 等等......
白／紅／黃金製造成份一般係18K，即含金75%再溝埋25%不同嘅合金造成的。而貴金屬錶一般在錶底會刻有AU 750, Platinum-鉑金錶含95%就刻PT 950. (注意瑞士製造嘅貴金屬手錶一定會打由瑞士官方認可嘅hallmarks 保證品質）。
通常Precious Metal上再配搭精細鑲嵌鑽石、寶石造出金光閃閃、價值連城精品，就係Luxury 超富貴客戶群嘅不二之選！
Gold-Steel/Bi-Metal: 金鋼手錶『金銀潤』8%主要係由不鏽鋼壳再加上貴金屬嘅錶圈及配件造成2-tone效果, 價錢當然比全Precious Metal 親民啲，屬中產人士近年流行之選！
Other Metals: 其他金屬有10%，如Aluminum鋁合金 及 Zinc Alloy 等等，我會介紹比較流行的Titanium鈦金屬 及 Bronze青銅 ；
Titanium: 鈦金屬 (Ti) 係航天科技物料，用於太空飛機軍事及醫療上，原鈦色偏啞灰. 好處係耐磨又比鋼輕身，會更適用設計運動功能或軍事錶款. 如加上PVD 或DLC (Diamond Like Coating) 加硬coating 顏色效果就更cool ！
鈦是醫療金屬可用於人體內骨架. 所以比其他金屬的Skin allergy 問題，鈦更不會引致皮膚敏感。行內一般製作會用Ti Grade 2 及高級少少的Ti Grade 5。
Bronze: 青銅 (CU) 係古時航海已經用嘅材料、但近年又流行起來，銅原色像黃金又重手，特別之處係經過佩戴及接觸原色表面會慢慢產生Raw色變化出灰、黑，青色造成Vintage Look，這種變黑變青色效果叫Patina就是Bronze的獨特性。佩戴越久，越見歲月的痕跡。
Other Materials: 其他物料19%種類繁多、包括我最心愛嘅高檔次Super Cars常用的Carbon Fiber Composites 碳纖維、永不磨損的Ceramic 陶瓷及Tungsten 鎢、通透超硬Sapphire 藍寶石水晶等等。
咁平價檔次有可造各種Pantone 顏色的Plastic 塑類物料; 如PU、PC、Nylon Fiber、Rubber、Acrylic等等。
以下不如用本人多年來為各品牌製作過嘅錶款，來展示下各種不同材料及顏色效果！ 下次再見👋
