馬場特工 2021年9月5日開鑼賽日
9月5日週日跑馬，用沙田全闊A跑道，跑足十場，一場盃賽為一班的特首盃讓賽。由於是今個馬季容許公眾訂位入場，估計會多番不少人氣，見到馬場人頭湧湧，作為馬迷都會感到開心。
今季未開波最多人講，一個是霍利時仔仔回港發展，另一個是五班只計兩場的問題。霍宏聲自少在港長大，加上一定有本地練馬師支持，所以特工覺得他留港絕對無問題。你擔心他的騎功好不好是多餘的，因在香港跑馬最緊要是有好馬，以及適應香港賽事形勢，騎功好不好其實不太有關係。君不見不少外地冠軍來港一籌莫展，反而其他在外地成績未算突出的騎師，反而可以長期留港嗎？
至於大家說到，日後作為五班馬馬主就慘，邊有練馬師收？尤其當人人也有兩場五班頭馬後。老實說，若果馬匹不叻，作為馬主一向都難找練馬師，而馬匹去到五班，total loss的機會不少。然而，對於部份已經達標的練馬師，也可能一樣樂意收五班馬，一來有位不妨賺多個錢，二來贏五班一樣有獎金，若果自己高班馬不夠別人好，不妨在五班賺錢吧。畢竟練五班馬跟練高班馬不一樣，五班馬經常是自己有傷病或跑姿問題的馬，所以操練不容易；反而高班馬，一來可能超分點操都贏，二來本身隻馬就有鬥心，所以練得不太出色一樣有點成績。
反而這次就可以度絕部份練馬師為求合格和搵食（也向馬主容易交代，話啦頭馬就拉頭馬），經常將三四班馬燉到五班以超班馬姿態勝出，又畢到業又搵到錢，唯一蝕的是馬主（因獎金少了、賠率也不高）。如果有大批這類馬的練馬師，可能要調教五班超班馬匹向上，並要見練馬功力真章，確保這些被燉馬能在三四班有競爭力，否則隨時真的不夠頭馬畢業。
今次投注方式，下注如下： 第3場 8號 勇眼光 第4場 4號 韋小寶 第5場 4號 陽明冠爵
W3x7 共300元 P3x4 共700元
累積投注 1,000元（包括今次） 累積回報 0元
Agent 14 (Photo Source: HKJC)