認清真相

文/ 盛酷生活 (2 March 2018)

大品牌等於安全可靠好品質？？？無矽等如天然？？點解要揀天然、有機產品？點知產品係咪真係天然、有機？ 花5分鐘認清真相。

筆者一向鐘情日本、韓國同歐洲嘅大牌子護膚品，從來冇了解過啲成份，就係信品牌，覺得大牌子唔會差得去邊，而且政府都有監管㗎啦。 直至有日唔覺意睇到篇資料，至驚覺原來政府對護膚品、個人護理產品係冇特別監管，呢個唔係淨係香港，世界好多地方都係咁；亦因為咁，嗰啲大牌子就好似冇皇管，佢哋心諗啲消費者都冇問、又照買，佢哋就緊係繼續生產啦、繼續賣啦！ 我越諗越覺得唔對路，決定要了解更多，唔再任人「魚肉」！

花咗好多個星期，睇咗好多主要地區法例、針對護膚品、個人護理產品成立嘅國際性非牟利組織嘅資料、對呢方面深入探討嘅bloggers、相關組織、公司等嘅網站，原來我真係太天真、太傻！原來自己唔為自己選擇、自己唔保護自己，係唔會有人幫你！

真相係…… 😠好多大牌子都唔會畀你睇個成份表，真係講個“信”字！筆者曾經專登走去問品牌櫃檯嘅化妝小姐，佢哋冇一個答到我產品裏面有啲咩！ 😠原來有好多有問題嘅化學成份、同已經有研究顯示可能致癌嘅化學成份等，大牌子生產商仍然使用，佢哋嘅擋箭牌係「暫時未有足夠證據」，就好似煙草商當年話啲人食煙後有肺癌，冇證據顯示係因為食咗佢哋嗰啲煙仔一樣。但作為消費者，點解我畀錢買仲要搵命博？ 😠唔只化學成份，有啲產品仲加咗塑膠原料，其中一個好普遍嘅就係磨砂膏，有唔少磨砂膏其中嘅「砂」其實係膠粒，當你用完後用水清洗，啲塑膠因為太細粒就會隨污水渠流出大海，啲魚同海洋生物就會食咗，除咗造成自然生態災害，人類都可能會自己食番呢啲海產，自作自受。 😠好啦，於是有啲消費者就嘗試搵啲“天然啲”嘅產品，啲生產商睇到需求，於是就喺產品度加兩、三隻天然成份，然後喺包裝度放到大大隻字，等消費者誤以為成支產品都係天然，其實嗰啲有問題化學成份冇拎走到，仲喺度。

😠大家有冇留意近呢年多咗好多洗頭水話 “無矽”？一年前你可能只可以搵到一、兩個牌子，今日已經幾乎所有品牌都有啦。點解會咁？就係因為越來越多人聽過矽唔好，要揀無矽嘅產品(但未必知點解！)，就係因為市場有需求，於是生產商就生產。呢度有兩點要留意: 1)消費者係有能力令生產商改變，你嘅購買就係你嘅選票；2) 冇矽≠天然！好遺憾，好多生產商將冇矽產品包裝到等如天然。記住，無矽產品只係將產品裏面嘅矽拎走，其他化學成份仲响樹。

作為消費者，當我好灰好絕望嘅時候😔，發現天真係無絕人之路！原來呢個世界有一群人成立咗啲非牟利獨立機構，專門審核產品係咪真正天然、真正有機，及格嘅至可以獲得認證。佢哋從原材料種植嘅農場至生產嘅每個環節，都逐一審核，確保符合一系列嚴格要求，冇用任何已確定/懷疑有害成份、冇基因改造成份、冇人造色素和香料之外，所有天然、有機成份所佔產品成份仲要達到指定水平、生產過程同產品包裝都要滿足環保要求等。更重要係，個認證唔係一勞永逸，每一兩年就要從新審核。

現時生產商聲稱產品天然、有機係冇法例監管，即係話佢自己話咩都得。攞天然、有機認證亦只係自願性質嘅行為。當你明白攞一個認證要付出多大氣力，從原材料種植到成品生產都要經過審核，如果個生產商唔係有咁嘅決心、付出心血資源投入，喺冇可能會去申請以至得到認證。

下列係部份針對護膚品/個人護理產品嘅主要國際性認證機構😍：

ECOCERT

ICEA

BDIH

Soil Association

COSMEBIO

做個精明消費者，今天起拒絕讓(懷疑)有害化學成份繼續侵害自己和家人，選擇獲認證嘅天然、有機產品。做個對自己、對地球最有愛嘅選擇！😘

https://www.estival.life/pages/the-truth